PENEMU DUNYA IBAN

UBAH KSSR ARI KBSR DALAM KURIKULUM JAKU IBAN SEKULA PRIMARI

Nitihka penemu ti dipansutka Jah & Faridah (2011), ubah Kurikulum Standard Sekula Primari (KSSR) ari Kurikulum Bersepadu Sekula Primari (KBSR) tu siti ari proses transformasyen dikena nyeleti sereta nyeruri kurikulum ngambika entap sereta tegap nitihka peneka enggau semengat Falsafah Pendidikan Kebangsaan. Bisi lima aspek ti midaka KSSR ari KBSR iya nya langkah rapat kurikulum, kereban kurikulum, organisasyen kurikulum, pengisi kurikulum enggau chara tisih.

1 Langkah Rapat Kurikulum

Ubah KSSR ari KBSR dalam kurikulum jaku Iban sekula primari keterubah iya nya langkah rapat kurikulum. Dalam KBSR, langkah rapat kurikulum jaku Iban tu betukuh linear (Kementerian Pendidikan Malaysia, 1992). Kebuah pia, bepelasarka Kerembai Turai Pelajar Jaku Iban Taun 3, kurikulum tu diajar nitihka rurun ti berengkah enggau asil pelajar, kerembai asil pelajar lalu ditangkanka enggau langgur pengawa tauka kereban ti bisi dikena dalam proses ngajar enggau belajar dalam kelas. Ambika banding, lebuh ngajar nembiak pengelandik mending enggau bejaku, pengajar patut menatika penau nembiak bejaku, mending lalu mida isi pelajar ti didinga dalam mayuh pekara ti diajar enggau dipelajar. Dalam pengelandik mending, nembiak dipinta ningaka lagu, rima enggau cherita ti ngerinduka ati sida. Bepelasarka Kerembai Turai Pelajar tu, pengawa nembiak ti mending enggau bejaku nya ngayanka langgur pengawa baka bepasangka radio dikena sida ningaka lagu ulih meransang pengawa bejaku. Nya alai, langkah rapat kurikulum dalam KBSR tu tau dikumbai betukuh linear.

Taja pia, langkah rapat kurikulum jaku Iban dalam KSSR tu betukuh modular. Kurikulum ti baka tu ngembuan begian tauka unit dikumbai modul. Nitihka KSSR, proses ngajar enggau belajar jaku Iban tu ditetapka ngena langkah rapat modular. Reti nya, tetiap pengelandik jaku diberi fokus ti sama rata. Enggau nya, pengajar patut ngatur langgur ngajar sehari nyemetak nitihka siti-siti pengelandik ti ditentuka topik ti diajar ba hari nya. Chara tu mih ti midaka iya enggau KBSR ti endang tulin nitihka rurun dalam turai pelajar. Langkah rapat modular tu dikemeranka ngambika semua pengelandik jaku enggau sistem jaku ulih dipesakum sechara strategik baka tidipeda dalam standard isi enggau standard pelajar. Ambika banding, lebuh ngajar macha, pengelandik jaku ke bukai patut ditarak dalam awak nya tang fokus diberi nagai pengelandik macha.

2 Kereban Kurikulum

Ubah KSSR ari KBSR dalam kurikulum jaku Iban sekula primari ti kedua iya nya ari sukut kereban kurikulum. Dalam KBSR, pengajar bisi bekenaka turai pelajar enggau kerembai turai pelajar nyadika malin lebuh ngajar enggau belajar dalam kelas (Mok Soon Sang, 2010). Nitihka Kerembai Turai Pelajar Taun 3, isi dokumen dalam KBSR tu mungkur pengelandik jaku enggau sistem jaku sereta konteks pengisi kokurikulum ti engkeman ba pengidup nembiak besehari-hari. Isi Kerembai Kurikulum tu dibagi ngagai tiga sitak. Sitak keterubah ngundan asil pelajar ti ngaraka pengelandik jaku enggau sistem jaku ti udah ditagaka dalam Turai Pelajar lalu disadang ditemu nembiak. Ba sitak kedua, ngundan Kerembai Asil Pelajar ti ngerembaika asil pelajar ngagai mayuh bengkah pengelandik. Chunto pengelandik nembiak bisi ditempa pengajar dalam jaku Iban iya nya pengelandik jaku ti mungkur pengelandik mending enggau bejaku, pengelandik macha sereta pengelandik nulis. Dalam kerembai asil pelajar, pengelandik bisi dibagi ngagai tiga tikas. Tikas 1 nya tikas ti pemadu baruh ti patut ditemu nembiak. Udahnya, nembiak ti udah bisi pengelandik dalam tikas 1 ulih bekinsit ngagai tikas 2 ti diungkupka ngagai nembiak ti jelan. Tikas 3 nya tikas tinggi ti diungkupka nembiak ti pintar agi. Ba sitak kepenudi dalam Kerembai Turai Pelajar tu bisi ngundan langgur pengawa. Langgur pengawa tu digaga nyalika malin sereta penerang ti tau mantu nembiak ngerembaika asil pelajar lalu ulih nguasa pengelandik ti bekaul enggau asil pelajar. Chunto Asil Pelajar ti diambi ari Kerembai Turai Pelajar Taun 3 tau dipeda dalam kar di baruh tu :

$Description: D:\Kerembai Turai taun3.PNG$

Kar 1 : Chunto Asil pelajar bepelasarka Kerembai Turai Pelajar

Dalam KSSR, malin dikena pengajar bejalaika proses ngajar enggau belajar dalam kelas iya nya bepelasarka Dokumen Standard ti ngundan dua bengkah komponen iya nya Standard Isi enggau Standard Pelajar. Dalam Modul Teras Elektif Bahasa Iban Tahap 1 (2011), Standard Isi tu mai reti ngaraka standard minimum penemu, pengelandik enggau peneleba ti patut dikembuan nembiak sepenembu sida belajar ba sekula primari. Dalam Standard Isi, pengajar patut ngajar sereta ngembing nembiak bepelasarka tema pelajar. Tema tu ngundan penemu ti patut ditemu nembiak ti belajar laban ulih mantu pengajar milih topik ti seriran enggau penau nembiak. Dalam KSSR, bisi tiga bengkah tema. Keterubah iya nya Dunya Diri empu, kedua, Dunya Penemu enggau kepenudi iya nya Dunya Ensera Enggau Cherita. Nya alai, bala pengajar ti merambu pelajar sida patut beratika rampa dunya nembiak laban peneleba nembiak ti benung belajar nya amat bekaul enggau rampa dunya sida iya empu. Bebida enggau standard pelajar ti ngayanka tikas penemu, peneleba enggau pengelandik tauka tingkat profesiensi ti patut dikembuan nembiak dalam setiap peringkat tauka kelas ba sekula primari.. Dikena ngemujurka objektif dalam standard pelajar tu, pengajar patut chakah ngelapung nembiak ngambika ulih nyungkakka pengelandik jaku sida. Kelimpah ari nya, pengajar dipaduka ngambika nemu nama sekeda pekara ti udah ditemu sida pasal sesebengkah topik sebedau sida ngajar. Chara tu beguna ngambika pengajar ulih ngatur ni bagi input baru ti deka dikenataika iya lalu ni pemayuh latih ti patut diungkupka sida. Chunto kar ti diambi ari Modul Teras Elektif Bahasa Iban Tahap 1 2011 tau dipeda ba baruh tu :

Kar 2 : Chunto Standard Isi enggau Standard Pelajar dalam Dokumen Standard

2.3 Organisasyen Kurikulum

Nangkanka nya, organisasyen kurikulum mega siti ari ubah KSSR ari KBSR dalam kurikulum jaku Iban sekula primari. Nitihka Tuan Jah (2011), KBSR enggau KSSR tu ditusun nitihka tahap iya nya bisi tahap 1 enggau tahap 2. Dalam KBSR, jaku Iban semina diajar ngagai nembiak primari 3 bagi tahap 1. Berindik ari nya, dalam pengawa ngajar, bisi siti program ti dikeluarka Pusat Sumber Pendidikan Negeri Sarawak (2006) iya nya Program Radio Sekula Pelajar Jaku Iban ungkup primari 3. Ba pelasar kenang dalam bup tu madahka program tu dikeluarka ngambika ulih mantu bala pengajar enggau nembiak ngajar enggau belajar. Program Radio Sekula tu mega bisi ngundan 15 iti topik ti mungkur jalai jaku, pemereti mendingka randau, leka main enggau pengelandik bukai belalauka Kerembai Turai Pelajar Taun 3. Nambahka mega, bisi tiga batang pekara ti balat dikemerenka dalam program tu iya nya nyendiaka pengelandik mending dalam pengawa ngajar enggau belajar. Kedua iya nya nyendiaka pelajar ti ngasuh nembiak ransing lalu enda mudah leju tauka dikumbai joyful learning enggau ketiga iya nya nyendiaka chara belajar ke bereti enggau chara belajar nengkebang ngena jaku ti menuku sereta menyana. Jaku Iban tahap 1 tu mega semina ditaga sepenyampau 120 minit aja dalam pengawa ngajar enggau belajar dalam kelas. Nya alai, bepelasarka Strategi enggau Organisasi Pelajar dalam Kerembai Turai Pelajar Jaku Iban, ari faktor jam nya mih, Kerembai Kurikulum tu ditusun dalam atur ti mudah ngambika asil pelajar ulih dikenataika enggau lenak.

Bebida ari KBSR, jaku Iban bisi diajar ba tahap 1 enggau tahap 2 dalam Kurikulum Standard Sekula Primari (KSSR). Ubah baka tu mandangka pengeliat sereta pengangkun bala pemesai raban bansa Iban ti deka ngentap sereta nukuhka jaku Iban nitihka ubah pemansang dunya. Ari nya tadi, bala pengajar ti ngambuh lalu nempa nembiak dalam belajarka jaku Iban patut ransing sereta regas nyikap diri ngena penemu baru ngambika ulih ngenataika penemu nya enggau manah sereta lati ngagai nembiak. Bagi tahap 1, mata pelajar bisi diajar ba primari 1, 2, enggau 3 lalu bagi tahap 2, mata pelajar jaku Iban bisi diajar ba primari 4, 5 enggau 6. Taja pia, mata pelajar jaku Iban tu nadai ditisih dalam peresa UPSR tang bisi ditisih ngena chara formatif enggau sumatif bagi kedua-dua tahap nya. Bekenangka senentang letak jam, pengawa ngajar enggau belajar jaku Iban ba sekula primari ditetapka semina 90 minit nitihka Kurikulum Standard Sekula Primari ti dikeluarka Bahagian Pembangunan Kurikulum (2011). Nya alai, bala pengajar patut nemu ngatur pelajar dalam Langgur Pelajar Setaun ngambika ulih magi topik tauka tema ti nyengkaum jalai jaku enggau pengelandik jaku ungkup sepemanjai taun dalam tiap-tiap tikas. Dalam langgur pelajar nya mega, pengajar ulih ngayanka strategi ngajar nitihka tikas.

4 Pengisi Kurikulum

Ukai semina nya aja, ubah KSSR ari KBSR dalam kurikulum jaku Iban sekula primari iya nya bekaul enggau pengisi kurikulum. Dalam KBSR, pengelandik beukur tambah semina ngembuan dua komponen iya nya pengelandik bepikir chara kreatif enggau kritis. Nitihka Chaffee (1998), madahka berunding siti ari pengawa bepikir ti ngembuan tuju enggau berurun nyengkaum siku-siku mensia nyerenih runding kediri empu enggau orang bukai. Penemu tu mega disukung Presseisen (1987), madahka pengelandik berunding siti ari proses pikir dikena ngulihka tauka ngaga penemu neresa proses belemati. Dalam pelajar jaku Iban, pengelandik bepikir tu beguna dalam aktiviti mending, bejaku, macha enggau nulis. Bepelasarka Kurikulum Bersepadu Sekula Primari, pengelandik bepikir chara kreatif dalam pelajar jaku Iban tu ngayanka nembiak ti ulih nengkebang enggau ngasilka idea, ngaga hipotesis, nyagam pekara baru sereta ulih ngaulka idea ba kerembai asil pelajar. Taja pia, dalam pengelandik bepikir chara kritis, nembiak ditagaka ulih ngaga banding bida, ngitak, nyirika, ngaga jurai, nusun sereta ngaga simpul senentang siti topik ti udah diajar bepelasarka tema pelajar jaku Iban dalam Kerembai Turai Pelajar Jaku Iban.

Taja pia, dalam KSSR pengelandik beukur tambah bisi nambah ngagai sembilan komponen iya nya pengelandik bepikir, pengelandik belajar chara belajar, pengelandik teknologi pemadah enggau komunikasyen (ICT), pengelandik futuristik,pengelandik pemintar mayuh chabang, pengelandik belajar konstruktivisme, pengelandik belajar kontekstual, pengelandik dagang sereta pengelandik kreativiti enggau invokasyen. Pengelandik tu diserap dalam pengawa ngajar enggau belajar dikena nyendiaka nembiak napi pengidup ke balat enchabar kemaya hari tu. Berindik ari nya, pengajar enda tau enda nemu ngena penemu, pekira, langkah rapat, ripih jalai, teknik, peneleba, pengelandik enggau kreativiti dikena merambu pelajar ngambika ulih nyaup nembiak meretika isi pelajar lalu tau nyungkakka pengelandik beukur tambah nembiak dalam pengisi kurikulum (Chemaline, 2011). Nangkanka nya, bala pengajar rebak diatu mega patut bebendar agi mantaika mayuh macham perambu, langgur tauka strategi dikena ngajar dalam kelas. Pemujur nembiak diatu bepun ari gempung ari buah pikir enggau bantu bala pengajar, kereban bantu ngajar enggau palan alai belajar ti kondusif. Enti chara baka ti udah dipadah tadi nya diperambu, sechara enda langsung jaku Iban ngerembai sereta ngerekai dalam kurikulum pelajar jaku Iban.

5 Chara Tisih

Entudika nya, chara tisih mega siti ari ubah KSSR ari KBSR dalam kurikulum jaku Iban sekula primari. Ngena chara tisih, pengajar ulih ngelala sereta meretika pemaik nembiak lalu ulih merambu pelajar seraya ke nyeridi penemu nembiak ti agi pabu. Nitihka Chemaline (2011) dalam bup Pengelandik Jaku, bisi 2 konsep ti tau dikena bala pengajar ba pengawa tisih iya nya penggaya enggau seridi. Ngambika lenak agi, nembiak ti pintar diberi pengajar aktiviti tambah nyadika pengawa pengaya penemu lalu nembiak ti kurang nya diberi aktiviti seridi dikena nyaup sida nyapai stanndard tauka objektif pelajar ti udah diperambu. Nya alai, chara tisih tu dibagi ngagai dua iya nya sumatif enggau formatif. Dalam KBSR, tisih ti dikena ngemeratka chara sumatif. Tisih sumatif tu dipejalaika ari ti nguji tauka meri peresa formal. Chunto peresa ti ngena tisih sumatif iya nya Penilaian Kemajuan Berasaskan Sekolah (PKBS) enggau peresa UPSR. Pekara ti ditekankan dalam tisih ngena chara sumatif tu iya nya aspek kognitif, afektif enggau psikomotor sereta baga enggau pengingin (minat) nembiak nya. Taja pia, tisih chara sumatif tu ngembuan pengurang laban ngena chara peresa ti ngasuh bala nembiak ngapal topik-topik dalam turai pelajar lalu nadai ngemeratka pengelandik ti bukai.

Dikena nyeruri pengurang ti bisi dalam tisih KBSR, siti elemen baru ti ditempa dalam sistem tisih KSSR iya nya Sistem Pentaksiran Pendidikan Kebangsaan (SPPK) enggau tuju dikena ngurangka peresa lalu ngentapka Pentaksiran Berasaskan Sekolah (PBS), nyerenih pelajar nembiak, tisih sechara holistik enggau sechara terus. Tisih ti dikena dalam KSSR tu iya nya tisih formatif enggau sumatif. Nitihka Dokumen Standard Kurikulum dan Pentaksiran (2013), tisih formatif tu dipejalaika sepemanjai taun dikena beratika prestasi nembiak. Pengajar tau bejalaika chara tisih tu iya nya ngasuh nembiak ngaga kereja laitih, folio, pansik beraban, kuiz enggau pengelandik mantaika asil pengawa ngena multimedia tauka ICT. Kelimpah tisih formatif, tisih sumatif mega bisi dikemeranka dalam KSSR. Tisih tu dipejalaika nitihka timpuh ti ditetapka tauka sepengudah nembiak neresa aktiviti belajar bepelasarka gempung standard pelajar ke ditentuka pengajar. Chunto pengawa ti tau dikereja nembiak ngena chara tisih tu iya nya meri kereja latih, gerak kereja inkuiri, keretas peresa enggau ti bukai. Ari nya tadi, dia kitai nemu tanggung pengawa pengajar tu berat amat. Sida patut begunaka inisiatif, imaginasyen, kreativiti enggau penajam runding lebuh merambu pelajar Jaku Iban ti semitan ungkup nembiak sida.

PENEMU ENGGAU BUAH RUNDING TEBANGKAR BEKAUL BIDANG LINGUISTIK

1 Edward Sapir

Edward Sapir (1884 – 1939) siku ari tebangkar tebilang ba menua Amerika ti bisi nisih bekaul enggau bidang linguistik. Iya tebangkar ti keterubah mansik enggau silik kaul antara pansik jaku enggau antropologi. Anda jaku tu mega bisi mantaika buah runding madahka jaku tu siti sistem ti berubah lebuh kitai mensia mantaika geregayak ati sereta runding kitai bekaul enggau pengidup besehari-hari. Kelimpah ari nya, jaku mega beguna ari sukut sosial. Kebuah pia, jaku nya menalan ti pemadu beguna ngagai kitai mensia dikena bekomunikasyen enggau diri sama diri. Ari jaku iya ulih ngayanka identiti sereta jati diri kitai. Makin mayuh orang ti bejaku ngena sesebengkah jaku nya, makin ngerembai konteks iya dikena lalu makin mayuh mega bida ari sukut jaku nya dikena (Zulkifley, Ramli & Rahim, 2007). Ba runding Sapir, taja pan jaku tu enda tentu beguna ngagai kitai mensia, tang jaku mega ulih neritka agi kaul diri sama diri. Ari penemu Sapir tadi, dia kitai ulih nyagam jaku tu siti ari elemen ti nentuka pekara ti deka disebut kitai. Dipejuraika enggau lenak agi, kitai mensia ulih begulai manah ketegal ngembuan jaku. Berindik ari nya, kitai idup ba dunya nyata, dunya sengenda tu asil ari jaku ti ditempa kitai empu bepelasarka utai ti ngelingi. Nya alai, lebuh diperatika, pekara tauka jaku ti ditempa kitai ukai dipelajarka sechara formal laban kitai meri penama ngagai siti-siti pekara nya bepelasarka utai ti dipeda kitai empu.

Edward Sapir bisi ngaga tisih ti diberi nama Hipotesis Sapir-Whorf asil ari buah runding enggau nembiak iya ti benama Benjamin Lee Whorf. Hipothesis ti digaga mandangka kaul antara jaku, runding enggau daya idup siku-siku mensia. Kedua-dua tebangkar tu bisi ngenataika dua hipothesis senentang teori linguistik. Hipothesis keterubah iya nya teori linguistik determinism ti mai reti jaku ti dikena raban bansa nentuka baka ni sida meragamka pekara ti ngelingi sida. Struktur jaku siti-siti raban bansa nya bebida ketegal ari chara sida berunding lebuh nentuka jaku ti enda sebaka. Chunto, raban bansa Iban nyebut ‘daun ubi’ nya daun empasa, daun jabang enggau daun bandung. Taja bakanya, reti pekara nya tadi agi sebaka. Chunto bukai baka raban bansa Inuit ulih berunding ba tikas tinggi senentang mayuh bansa leka jaku ti mandangka reti seleju laban sida ngembuan peneleba diri empu bebanding enggau kitai Iban ti semina madahka reti seleju nya ‘seleju’ aja ketegal ti nadai peneleba. Ari nya tadi, pekara ti disebut nya mantaika pikir siku-siku mensia. Pekara ke dirunding kitai bepanggai ba jaku ti dikena kitai. Nya alai, runding enggau daya idup endang ngembuan kaul ke rat enggau jaku. Tetiap raban bansa nyamai agi ngenataika penemu enti ngembuan pengerembai tauka pemaju ba jaku. Enggau nya, kitai ulih ngenataika jurai tauka penemu enggau lati sereta meruan lalu mudah diperetika sereta narit ati orang ti ninga.

Kelimpah teori linguistik determinism, teori relativism mega bisi dikenataika Sapir enggau nembiak iya, Benjamin Lee Whorf dalam hipothesis 2. Teori tu mantaika jaku ti ulih meri biuh ngagai runding mensia bepelasarka timpai dunya. Pekara ti dirunding nya bekaul enggau penemu, nilai, gerayak ati sereta adat tetiap raban bansa. Timpai dunya nya mih ti nyadi chuan kitai mensia bepikir tauka berunding. Ambika banding, taja pan biuh jaku nya enda tentu dikena tang raban bansa Inuit agi ulih berunding enggau maju senentang reti leka jaku ‘seleju’. Beduduk ari nya, timpai runding mih ti ulih nentuka jaku genap iku kitai mensia. Ngambika lenak agi, timpai runding ti ditempa bepelasarka peneleba lalu peneleba nya ke nentuka jaku siku-siku kitai mensia. Dikena nyimpul penemu Edward Sapir tu, iya mantaika buah runding ti madahka nadai siti jaku pan ti entap sereta meruan laban jaku dalam dunya tu siti elemen ke selalu berubah.

2 Ferdinand de Saussure

Siku agi tebangkar ti bisi nisih bekaul enggau bidang linguistik iya nya Ferdinand de Saussure (1857 – 1913) . Iya siku ari tebangkar linguistik ke tebilang bebansa Swiss. Anda jaku tu beberita dalam penemu bidang linguistik moden lalu dikelala orang siku ari pengepun linguistik deskriptif. Saussure bisi ngasilka bup ‘Course in General Linguistics’ ti ngujungka iya digelar orang ‘Apai Linguistik Moden’. Bisi empat pekara ba pengerembai runding linguistik ti ditisih iya nya bida langue enggau parole, tanda linguistik, bida sinkronik enggau diakronik sereta kaul antara sintagmatik enggau paradigmatik.

Dalam pengerembai runding keterubah, Saussure meri reti langue tu siti ari jaku ke standard ti dikena raban bansa. Leka jaku standard nya pekara ti udah diterima betul sereta diaku mensia mayuh ari sukut tukuh, gaya sereta ulih nyadika pelasar dikena manding pekara ti bekaul enggau jaku, chara nyebut, chara nyepil enggau ti bukai. Ambika banding, leka jaku Iban standard tu udah bisi dikena dalam pengawa perintah lalu udah dipelajarka ba sekula. Bebida mega ari parole ti sebaka reti enggau dialek. Iya mandangka jaku ke dikena siku-siku mensia nya bebida. Nitihka penemu Nor, Mohammad & Harishon (2009), lebuh bekenangka leka jaku dialek, iya suah dikena nyemakaka leman jaku ti dikena ba sesebengkah menua tauka leka jaku ti berubah laban kelas sosial. Ambika chunto, dialek bagi raban bansa Iban endang mayuh lalu bebida tang orang ti ditimbal iya bejaku nya agi ulih meretika jaku nya. Bisi nya ngena intonasyen ti tinggi lebuh berandau, bisi nya ngena intonasyen ti baruh lebuh berandau sereta lembut didinga. Ditetak ngena jaku pandak, parole tu ngembuan variasyen jaku ti bebida lebuh dikena tiap-tiap mensia. Nya alai langue enggau parole tu ngembuan dua pekara ti bebida sereta ngembuan reti ke enda sebaka.

Ba pengerembai runding kedua ti bisi diasilka Saussure iya nya tanda linguistik. Tanda linguistik ulih diperatika nengah dua bagi iya nya signifiant enggau signifie. Reti signifiant tauka signifier tu iya nya lambang siti-siti objek bepelasarka pekara ti ngelingi kitai. Iya tau datai ari gambar objek tauka datai ari munyi objek ti bisi ngelingi kitai. Ambika banding, gambar mayau sebengkah ari objek ti tau nyadi lambang bepelasarka utai ti ngelingi kitai. Taja pia, reti signifie tauka signfied iya nya mandangka konsep-konsep ti datai ari gambar tauka munyi lambang nya. Ambika chunto, leka jaku m-a-y-a-u siti ari konsep bepelasarka gambar mayau ti udah nyadika lambang dalam tanda linguistik.

Kelimpah ari nya mega, Ferdinand de Saussure bisi ngaga tisih senentang bida sinkronik enggau diakronik. Nitihka penemu Chaer dalam bup Pengantar Linguistik Bahasa Melayu ti ditulis Faridah & Tuan Jah (2013), sinkronik tu ngembuan penteba deskriptif iya nya semina nyadi dalam siti timpuh aja. Retinya, iya besangkut paut enggau pekara ti nyadi ba siti-siti timpuh maya lalu nadai besangkut paut enggau pengerembai sejarah tauka histori. Sinkronik tu mega bekaul enggau pansik senentang item dalam jaku. Dalam tisih Saussure tu, sinkronik tu nadai mandingka jaku ari siti taun ngagai taun ti bukai. Ambika banding, linguistik sinkronik semina nisih senentang struktur jaku Iban sebedau jeman British enggau sepengudah jeman British lebuh struktur jaku Iban udah manggai ba tikas ti tinggi. Bebida ari sinkronik, linguistik diakronik tu bisi nisih sejarah pengerembai ari keterubah jaku nya ditempa ngagai jaku nya lengis tauka midang baka jaku Latin enggau Sanskrit ti udah midang lalu nadai dikena agi (Awang Sariyan, 2007). Nya alai, siti bidang udah ditemu ti bisi mansik bekaul enggau diakronik iya nya linguistik sejarah. Ari nya, penemu senentang siti-siti jaku bisi dibandingka dikena meda bida enggau pengerembai iya dalam siti timpuh. Ambika chunto, chara ngarang jerpan jaku Iban suba (karang klasik) mayuh bida enggau chara ngarang jerpan jaku Iban kemaya hari tu (karang moden). Enti diperetika, diakronik tu lebih ngemeratka pansik senentang sistem jaku. Dalam penemu diakronik tu mega, pengerembai enggau ubah struktural jaku ulih ditemu kitai enggau lenak. Ambika banding, diakronik tu bisi nisih sejarah penatai jaku Iban sereta pengerembai iya lalu bisi mega nisih pengerembai jaku Sanskrit ari keterubah iya ditempa ngagai jaku nya midang baka ti udah dipadah ba pun tadi.

Penemu kepenudi dalam tisih Ferdinand de Saussure tu iya nya kaul antara sintagmatik enggau paradigmatik. Sintagmatik tu mandangka kaul ti nentuka reti dalam leka jaku tauka ayat. Saussure mega nuduhka penemu madahka sintagmatik tu bisi bekaul enggau bidang fonologi, morfologi sereta bidang sintaksis. Dalam bidang fonologi, atur sintagmatik ulih dipeda ba fonem dalam leka jaku. Ba bidang tu, lebuh fonem dalam siti-siti leka jaku nya diubah, reti leka jaku nya mega berubah. Ambika banding, leka jaku j/a/r/i ngembuan reti lebuh disebut tang lebuh fonem /a/ diganti enggau fonem /i/ dalam leka jaku nya, ia lalu nyadi leka jaku /j/i/r/a ti nadai mai reti. Kelimpah ari nya, atur sintagmatik dalam bidang morfologi ulih dipeda ba morfem dalam siti-siti leka jaku. Sebaka enggau atur fonem, reti dalam siti-siti leka jaku mega berubah enti morfem nya diubah. Chunto, jaku turu rama ‘tengah hari’ berubah reti enti diubah struktur iya nyadi ‘hari tengah’ ti nadai mai reti. Bekenang pasal atur sintagmatik dalam bidang sintaksis, iya bisi nisih atur nusun leka jaku dikena nempa ayat dalam jaku Iban. Kitai sama nemu lebuh ayat ti ngembuan reti ke menyana nya diubah, reti ayat nya tadi mega berubah ari reti asal. Ambika banding, ayat ‘Indai Endun nyendiaka pemakai sida sebilik’ nya ayat asal tang ayat nya berubah reti lebuh diubah nyadi ‘Sida sebilik nyendiaka pemakai Indai Endun’. Lalu ayat ‘Indai Endun sida sebilik pemakai nyendiaka’ nya mandangka ayat ti nadai ngembuan reti.

Bekalih ngagai kaul paradigmatik, penemu Saussure tu mandingka leka jaku dalam sistem jaku ke ngembuan patah sebut tauka munyi sereta fungsi ti sama tauka deka sama. Ambika banding, dalam ayat ‘Igat nikauka batu ngagai ukui nyin’ enggau ayat ‘Iya nyadi balu sepengudah pemati laki iya’ ngayanka leka jaku ‘batu’ enggau leka jaku ‘balu’ nya leka jaku ti ngembuan munyi ti deka sama. Nya alai, atur paradigmatik tu ngemeratka kaul antara leka jaku enggau rambai jaku ti bebida ( Noor Ein, 2003). Ambika banding, dalam ayat ‘Apai Sadom bisi ukui’ enggau ‘Apai Sadom bisi mayau’ ngayanka kaul antara ukui enggau mayau dipejuraika nengah atur paradigmatik. Tau mega dipadahka atur paradigmatik tu mandangka ubah guna leka jaku dalam ayat.

Pansik Senentang Tiun enggau Rentak Jaku Ti Bebida Entara Menua Saratok enggau Menua Kanowit

Tiun enggau rentak jaku tu endang sigi bebida ba sitak-sitak menua bagi Iban di Sarawak. Nitihka pansik Chemaline dalam bup Ensaiklopedia Iban (2001), raban bansa Balau enggau Undup diau di Batang Lupar enggau Batang Ai semak genturung pendiau orang bansa Dayak Bidayuh, Iban Remun ti emndam di menua Serian, Iban Dau mendap semak Sungai Klauh enda jauh ari Bukit Kelingkang, Iban Saribas ngidupka diri ba menua Layar, Paku, Padeh, Rimbas enggau Entanak lalu sekeda ngachir pendiau ngagai Krian, Julau, Kanowit, Sarikei enggau Batang Rajang.

Ba renggat tu, dipelabaka bida tiun enggau rentak jaku menua Saratok enggau menua Kanowit jauh amat bida. Orang Saratok ti nemuai ngagai menua Kanowit tentu alit amat ati ningaka jaku sida. Bisi nya munyi ti kasar lalu tau ngasuh ati pangan diri ensiban. Pekara tu tau ngujungka orang ti ninga nya enda nyamai ati ketegal balat amat jaku enggau sida lalu tau dikumbai nadai bebasa ke orang bukai. Ambika banding, ayat “amat udah pahai menyadi iya pia?” mandangka tiun ti kelalu kasar lalu tau ngasuh orang ti enda ngadang nya tekenyit ninga. Bebida enggau jaku orang Saratok, sida ngembuan tiun enggau rentak ti alus sereta bebasa. Nya alai, menua bukai ti udah suah ninga orang bejaku kasar sereta jampat nyau baka ke nganti bulan labuh ke tapak ninga pengelubah tiun menua Saratok disadaka. Berindik ari nya, kitai suah ninga sulu jaku ti ngumbai dikelala buah ari langgu, dikelala bungai ari kayu, dikelala basa ari penyiru, dikelala Saratok ari jaku. Endang amat ga orang Saratok dikelala basa ari penyiru dikena mandangka adat basa enggau ulah ti beradat ba siku-siku mensia. Chunto ayat “amat udah ninggal menyadi iya pia?” ngembuan tiun enggau sada ti alus sereta besebar. Kelimpah ari nya, rentak bakanya mega tau ngasuh orang bukai berasai lantang sereta nyamai pending ninga.

Nambahka nya, tiun enggau rentak jaku menua Saratok enggau Kanowit bebida ari sukut intonasyen tauka nada. Intonasyen nya tinggi-baruh ba ayat dalam jaku kitai. Suah mega munyi tinggi-baruh tu dikumbai entak sebut. Nitihka pansik Chemaline dalam bup Pengelandik Jaku (2011), intonasyen tu ulih dilambang ngena kinsit tingkat munyi nyawa ti ditanda ngena lumur satu reti nya tingkat munyi nyawa pemadu baruh, lumur dua nya tingkat munyi nyawa ti baruh, lumur tiga nya pemerat ti mai reti tingkat munyi nyawa tinggi lalu kepenudi nya lumur empat ti meri reti tingkat munyi nyawa pemadu tinggi. Chunto bida jaku Saratok enggau jaku Kanowit ari sukut intonasyen tau diperatika ba kar di baruh tu :

Jaku Saratok	Jaku Kanowit
²Kini kə penungoʔ nuan ²tadi	³Kini kə penunga dik ³tadiʔ
²Lapo nuan lalu ənda makai deh ²ujang	³Lapa dik lalu ənda makai deh ³ujang

Kar 5

Bepelasarka Kar 5, kitai ulih midaka jaku Saratok enggau jaku kanowit ari sukut tinggi-baruh tingkat munyi nyawa disadaka. Jaku orang Saratok tu endang tulin amat lubah ketegal tingkat munyi nyawa ti dikena sida iya nya tingkat munyi nyawa lumur dua ti mai reti baruh. Lebuh diperatika, tingkat munyi nyawa lumur dua tu seruran dikena kitai ngepunka sebut jaku lalu semampai dikena kitai berandau. Bebida mega ari tiun enggau rentak jaku Kanowit ti jampat sereta kasar laban tingkat munyi nyawa ti dikena sida nya entara lumur tiga (tinggi) lalu lumur empat (pemadu tinggi). Tiun enggau rentak jaku Kanowit tu tau nurun, tau niki, tau mega nyadi rata lebuh bekomunikasyen. Dalam chunto ba Kar 5 sentang jaku Kanowit, ayat tanya selalu iya ngembuan intonasyen ti niki ba pengunjung iya lalu lebuh berandau, intonasyen ti dikena tau mega nurun laban ngembuan ayat penyata. Enggau nya mega, intonasyen jaku menua Saratok selalu iya bebida nitihka konteks ayat ti digaga. Tiun enggau rentak jaku ti lubah sereta baruh endang nyadika identiti menua orang Saratok. Mindah ngagai menua bukai pan kitai, agi mih orang nemu kitai tu endang sigi penatai ari Saratok ketegal gaya jaku ti bebida.

Nangkanka nya, tiun enggau rentak jaku menua Saratok enggau Kanowit tu bebida ketegal ari faktor georgrafi. Kramsch, C (1998), madahka “it is widely believed that there is a natural connection between the language spoken by members of a social group and that group’s identity” (p.65). Kenyau ari nya, tiun enggau rentak jaku ti bebida bisi bekaul enggau pengengkah tauka penuduk ba siti-siti menua. Tiun jaku tunga ke Saratok ngembuan munyi ti lubah sereta bebasa lebuh berandau laban ai Sungai Krian bagi pelilih menua Saratok nya lubah sereta enda deras. Beduduk ari nya, ketegal ai ti lubah tau ngujungka perau nya lubah ka bejalai. Dikena ngemanjaika cherita ngambika pejalai ba perau nya enda berasai lama, bala orang Saratok pan berandau ngena tingkat munyi nyawa lubah enggau pangan diri. Pekara tu bebida enggau pendiau orang Kanowit ti bejaku jampat sereta kasar. Nitihka sejarah, ai bagi pelilih menua Kanowit nya deras sereta laju. Lebuh sida merau, dia sida beperak ngangau ke pangan diri ngambika perau sida ti ngelaban ai deras nya enda tekuing ke bukai. Nambahka nya, lebuh sida bejaku mit, bala ti bukai endang nadai dinga laban dauh wong ti ditujah sida nya inggar. Menua Kanowit ti ngembuan tingkat munyi nyawa tinggi lalu mantik didinga mega ketegal ngembuan penuduk georgrafi ti mayuh tanah landau baka emperan enggau paya. Menua tu mega endang meruan betengahka jalai ai laban nadai mayuh tanah bebukit. Faktor tu tau marit tiun sereta rentak jaku menua Kanowit ngena tingkat munyi nyawa tinggi lalu nyaris didinga.

Ukai semina nya, jaku Saratok enggau jaku Kanowit mega ulih dibida nengah chara bekenaka jeda. Jeda tau dikumbai palan alai besengah iya nya palan endur ngetu enda lama (Farid ,1989). Iya dikena nyeraraka munyi jaku enda lama ngambika meri reti ti tentu lebuh bekomunikasyen enggau orang bukai. Jeda tau ditanda ngena /#/, reti nya enti bisi tanda jeda dia, ngetu enda lama mih orang ti berandau enggau kitai. Chunto tau dipeda di baruh tu :

Jaku Saratok	Jaku Kanowit
# aku makai pisaŋ akiʔ #	aku makai pisaŋ akiʔ
indai # aku pədis pərut #	indai aku pədis pərut

Kar 6

Kar 6 mandangka bida jaku Saratok enggau jaku Kanowit ari sukut jeda. Bepelasarka chunto di atas nya, jaku Saratok ngembuan jeda lebuh sida berandau. Nya alai orang ti ditimbal enggau iya bejaku enda tentu mereti pekara ti deka dikenataika laban mayuh jeda dikena bebida enggau pelilih menua Kanowit ti nadai bekenaka jeda lebuh berandau. Nya alai, orang jampat agi mereti pekara ti dipadah ketegal jaku orang Kanowit nya mantik sereta inggar didinga. Lebuh ngena jeda, bisi dua bengkah reti ditemu. Ambika banding, ayat # aku makai pisaŋ akiʔ # meri reti orang ti bejaku nya makai pisang enggi aki iya. Bebida enggau ayat # aku makai pisaŋ # akiʔ ti mai reti orang ti bejaku nya madahka ngagai aki, iya makai pisang. Ba chunto ayat kedua ba Kar 5 sama mega konsep iya enggau chunto ti dipadah tadi. Besenutuk enggau nya, ketegal ti ngembuan jeda mih, tiun sereta rentak pelilih menua Saratok tu lubah ngambika meri reti ti terang ngagai orang ti ninga. Pengelama orang ti ngetu bejaku nya enda tentu lama, engka sesikin aja.

Dikena nachang tali perau, tiun enggau rentak jaku entara menua Saratok enggau menua Kanowit endang bebida ari pangan diri. Empas ari tiun enggau rentak jaku ti bebida ulih ngujungka orang ti enda kala ninga dialek ba siti-siti menua nya berasai alit ati lalu tau ngasuh sida salah sangka laban ti ngumbai orang nya nganu sida kelebih agi tunga menua Kanowit enggau menua Lubuk Antu. Nya alai, beguna amat kitai nemu dialek siti-siti menua ngambika ulih begulai sereta bisi peneleba enggau orang ba pelilih menua bukai. Bepansikka tiun enggau rentak jaku menua bukai baka tu mega meri penguntung ngagai kitai ke bisi pengingin ati deka belajarka bansa diri ngambika jaku kitai tau meruan sereta menyana baka jaku bansa bukai ke udah dulu maju nitihka arus singkang pemansang dunya globalisasyen kemaya hari tu.